腦場今日最大新聞，一定係剛被口人扑爆玻璃嘅高登數碼，愚人節一早又畀人淋紅油，管理通已經通知店主同報警，所謂一不離二、接二連三 🤐，腦場花生價錢又升至歷史新高，以上、完。

貧僧收到風，ASUS ROG Chariot RGB 電競椅會係 4 月下旬到貨，今日上到 HKEPC 見到實物，真係想打刧佢翻屋企啊，大大隻「敗家之眼」就知唔慌平，賣街 HK$4,299、限量發售，今日開始接受 Pre-Order 會加送禮物，大家可以搵中田、正刀、宇宙、海鮮舫、CMAX、SE、2千分、OMG 果幾間落訂喎。

AMD CPU 全球大賣，香港就反潮流 Intel 完勝 AMD，貧僧收集腦場咗幾間 C 開頭大舖嘅數據，你會發現賣得最多係 Intel 9100 / 9100F 🏅，第二名係 Intel 9700 / 9700F 🥈，第三名先係 AMD 3600🥉， 主要原因係︰「 AMD 香港代理超廢」，咩 Q 型號都缺貨，包括最多人買嘅 AMD 3200G / 3400G，貧僧係賣 CPU ，畀消毒酒精我托咩，當然 AMD 主機板缺貨再加上香港用家對 Intel 較有好感，亦係原因之一。

小僧翻到鋪頭，見到少量 GALAX HOF OC Lab RGB 記憶體到貨，白色散熱器、大大個 HOF 皇冠、ARGB 燈效，更重要係 DDR4-4000 CL19 16GB Kit 只係賣 HK$899， 同其他 3600 同價係咩玩法，一定係幻覺、嚇我唔到嘅 ?

訂左批 be quiet! Silent Wings 3 PWM High Speed 12cm 風扇，隔左成個月先到貨 🤦🏻，六極馬達配三相靜音電機， 最高 73.33/CFM、3.37mmH2O，100%轉速下聲噪只有28.6 dBA ，用來打冷排、散熱器一流，買風扇除左 💩 ，靜音雞翼3 都唔錯架，12cm 賣緊 HK$165、14cm HK$185，強仔三年保。