[技術討論] 韓國新車落地(考牌+買車+駕駛經驗分享) & 三年後45000KM實況

Wailamtam

[新車使用三年幾後的情況...] https://www.hkepc.com/forum/redi ... 04&pid=39564479



好慶幸自己新車落地，總算冇穿冇爛成功渡過5000公里
想在此同大家分享下一D小弟考牌 + 買車 + 駕駛的經驗，希望可以幫到各位新手更加順利享受駕駛樂趣
(利申: 15堂考試幸運地一次成功 + 新車只是平價的款式)

考牌篇：
小弟中學之後已經好想駕駛汽車，但是有礙於家人的反對，最終在上年七月中才決定學車
同好多人一樣，第一個問題，點樣學好？駕駛學院 / 普通駕駛學校 / 搵師傅 ?

最後我選擇了普通駕駛學校，原因有幾個:
1. 駕駛學院學車套餐收費已經比較貴，補鐘價更加高達$5xx   (由朋友得知)
2. 普通駕駛學校總算有大大個舖頭位，亦都有正式收據給你，有咩事追數都方便D
3. 普通駕駛學校有番咁上下數目的師傅，總有辦法安排到一個給你
4. 我所報讀的普通駕駛學校，地理位置十分方便，上理論堂和搞手續都慳返啲時間

選擇了學校後，我可能比其他人多了一個選擇，就是選擇到哪裏應考?
我本身是居住在新界西的，按照道理是喺九龍或新界應考，但由於我想盡快考到車牌
加上本身在港島區工作，最終選擇了在港島區掃桿埔應考 (的確等待唔使半年就考到路試)

筆試順利通過後，於考試前兩個月開始練車，總算剛剛好用盡時間上齊所有堂亦都學有所成
以下是一些小弟學車的心得:
1. 練車第一天就同師傅講好，由於工作忙 + 預算有限我盡量不想補鐘，師父亦都明白之後也盡心教我
2. 可以的話一開始不需要太著重練習擰頭望鏡等，先練習好轉波 / 加減速 / 起步停止等嘅基本動作，因為只要練習好基本動作擰頭望鏡記燈位等相對會簡單得很多
3. 若果同師傅唔夾就盡早出聲，早啲換好過到後來先後悔 (朋友經驗)
4. 開始練熟之後嘗試選擇多人 / 路面繁忙嘅時間學車，盡力體會最多不可思議嘅事情發生 (親身經歷試過路面太繁忙被迫停在黃格內，師傅即時指教如何應對 )
5. 當你發現練車時冇做錯動作，又可以同師父傾閒計，你應該就接近成功了

最終於二月中考合併試幸運地一次成功了
總結由報讀到應考成功，前後總共用了約七個月時間，共花費( 連政府考試費及學牌費 ) 約$7000


買車篇：
考試成功後，心知自己駕駛經驗不足，很想找個方法可以隨時練車
曾經想過喺假日時候租普通車去練習，但係原來絕大部分租車公司或網站都不允許P牌去租
加上心中覺得係時候可以和需要擁有一部汽車，所以開始踏上買車之路...

問題又來了，新車還是二手車好?
最後我選擇了買新車，主要因為自己對二手車知識甚少，覺得未有資格去選購一架好嘅二手車
和原來部分新車價格比我想像中相宜，暫時可以負擔得起

決定了買新車，買咩車相對我來說十分簡單，因為最大目標就價格相宜
本身一開始係想買返棍波私家車，貪佢維修成本較低和駕駛比較有樂趣
但係心儀嘅車款棍波版已經沒有貨了，所以最終選擇了同款的自動波版 ( 及後先發現原來揸自動波真係方便好多  )

我所選擇嘅係當時市面上差不多最相宜嘅 Kia Morning EX+ Sport
相信有啲朋友對韓國車都抱有懷疑，包括我自己在內
不過喺同等價錢下，Morning 係畀到最貼心嘅設備你，而自己去陳列室試車後心裏覺得都十分滿意，不到半個月便決定買了~

到現在已經唔經唔覺駕駛5000公里，可以為愛駒來個簡單的評價:
1. 外型方面其實自己幾滿意，內籠設計實用性高 (試駕過 BMW 某熱賣SAV款式比較之下)
   1.1 冷氣出風到位，噪音比較細小，也彷彿有冷暖變頻效果
   1.2 儀錶板資訊清晰，而且不易反光
   1.3 車頭飾物櫃和中控台下儲物空間更多更方便
   1.4 前座座位長期駕駛更舒適 (比較涼爽)
2. 動力比想像中更多，雖然絕對不能說十分強勁，但一兩個人乘坐時絕對可以飛下車；即使滿載貨物或人跑赤柱山路，只需要用較深的油門即可有足夠動力
3. 因為使用傳統波箱，深油門高轉時有聲音快感
4. 後座的乘坐感其實比想像中好
5. 駕駛操控感覺十分容易，行車其實相對穩定，即使快速過彎亦沒有問題
6. 尾箱空間真的不太夠用，搬運大型物件需要平放後面座椅
7. 音響系統音色差，最麻煩是沒有直接支援藍牙
8. 雙幅式軚盤原來幾好渣
9. 原裝車胎規格較特殊，換呔沒有什麼選擇
10. 原廠維修服務幾滿意，服務人員態度良好，第一次換偈油維修檢查只需 $5xx 而且包洗車清潔
11. 耗油量算偏高，約 7.4L/100KM (自己開得算快)
12. 隔音效果只屬一般，落大雨時的車頂雨聲不小

如之前所說小弟有幸可以多次試駕過 BMW 某熱賣SAV款式，駕駛感覺出奇地相差不遠(可能因為大家都係歐式設計)，很容易上手
分別比較大的是加速力，BMW的確甚麼時間都力量充足；另外BMW尾箱和後座空間十分出色
不過容易駕駛反而Morning更優勝，特別是停車前的速度控制，該BMW有時的確難以掌握
所以個人意見認爲，除非追求較大動力 / 空間 / 低耗油量，其實如Morning這類小車十分適合預算不多的新牌仔


駕駛篇：
作為一個新牌仔，路面經驗當然依然不足，不過都開始慢慢習慣在馬路上駕駛了。以下我會分享一些自己駕駛時的小秘訣，譲各位可以更容易在馬路上安心駕駛。

1. 一定要安裝車 Cam，目的除了在意外時有記錄外，也可以拍攝低一些不負責任 / 惡劣司機的行為，在必要時向警方舉報( 小弟親身經歷俾人惡意cut線險些碰撞 ，而且被對方反告不小心駕駛 )
2. 開車前確保在旅途中要用到的手機 app 已經開啟並設定好，例如一些導航 / 測速 / 交通消息 app，應開車前 set 好曬，不要一邊開車一邊設定，以免分心發生意外，有需要叫你的同車朋友幫手
3. 若果路途中需要經過隧道橋樑收費，最好喺開車前已經準備相關收費，不要到收費站前才急急準備 ( 小弟試過去到西隧口先發現沒有現金，要浪費15分鐘讓隧道職員安排欠單  )
4. 切線入高速公路前，最好與前車保留兩至三個車位，不要貼近前車排隊；因為前車出車後，後方可能馬上有車趕至，沒有保留車位空間便不能調節車速再次進入，容易被逼入切線位末端死角
5. 在燈口或路口前要收慢車速，並多加注意路面上的標記，因為很多時候每條行車線只能去到特定方向或地方，入錯了便要被迫走遠路
6. 在絕對安全和不繁忙時才接聽電話，因為聽電話會令你分心判斷力降低，容易發生意外 ( 小弟試過因聽電話出錯迴旋處 + 另一次轉彎入路囗時不小心上膊 )
7. 最好清楚了解自己汽車爆呔時的應對方法，不要到真的爆胎時才急忙找說明書了解 ( 小弟試過新車落地三個月在深夜時分的高速公路因路面凹陷爆呔，當時真的有點不知所措，當時幸好得到附近隧道職員指教才能自己換上後備呔  )
8. 作為一個 P 牌仔 / 唔熟路要慢車其實係理所當然，當被後車推 / 響咹 / 閃燈示意要你加速時，千萬不要強行加速配合他人節奏，你只需要保持穩定車速繼續行車，有避車處或巴士站才減速讓車；如果在高速公路俾人狂推，記住記住只要保持適當速度，因為當後車發覺推你唔快，佢自然會轉線走人


以上就是小弟一年多以來的小小經驗分享，當中可能有不少個人意見，若果有所得罪或不認同請勿見怪
只係希望這些個人經驗可以幫到大家，在香港這個繁囂的城市中，可以更加簡單享受駕駛的樂趣！Thanks!
最後就是分享返一些小弟愛駒的相片，希望大家鍾意

下載 (140.27 KB)

2017-10-8 17:32

下載 (122.15 KB)

2017-10-8 17:32

下載 (126.55 KB)

2017-10-8 17:32

PPLd

好慶幸自己新車落地，總算冇穿冇爛成功渡過5000公里
想在此同大家分享下一D小弟考牌 + 買車 + 駕駛的 ...
Wailamtam 發表於 2017-10-8 17:43

Thanks for the excellent sharing.

foxivan

very good post, support and enjoy driving!

would

好文，對新手來講好值得參考
支持

jazz2014

當年我雪牌買車既過來人講下

1) 睇電話 地圖 睇埋地線 ，行熟左既路 就早d入岩既線 因為細車仔 底馬力既 cut線係勁慢

2) 兩線左或右轉 小心 如出線係外線要駛遠先轉彎 唔好食人地條線 ，留意巴士 長車 食2條線，2線轉灣出3線 留意自己左右既車

nkc1989hkjc

好有心機寫文~!!support good post!
but 在高速公路俾人狂推<--你不是做快線?吧?

修改by: A君

遊客

可否分享埋由俾錢至渣走部車中間嘅過程？
有咩手續？係咪 sales 會幫手搞埋？

未買過車
謝謝

hkd$

學15堂去考，超勁

via HKEPC Reader for Android

Jazz

好有心機寫文~!!support good post!
but 在高速公路俾人狂推
nkc1989hkjc 發表於 8/10/2017 20:47

    魔鈴都要推人 真係非中型莫屬

hkd$

回復 1 #Wailamtam

一定要安裝車 Cam，目的除了在意外時有記錄外，也可以拍攝低一些不負責任 / 惡劣司機的行為，在必要時向警方舉報( 小弟親身經歷俾人惡意cut線險些碰撞 ，而且被對方反告不小心駕駛)





呢單野如何?
佢告你告得入?

via HKEPC Reader for Android