本帖最後由 niyaniya 於 2019-9-28 20:48 編輯
其他帖子導覽：
[教學]第一次拯救iPhone大戰
https://goo.gl/e1VRnZ
[教學]第二次拯救iPhone大戰(入水6s)
https://goo.gl/j02f2H
[教學]碾碎iPad 2大翻身
https://goo.gl/U23ZuE
[研究]Notebook維修記
https://goo.gl/gkKnT6
[教學]Notebook維修記2
https://goo.gl/GSomBZ
[教學]PC保養 before after~(低成本)
https://goo.gl/4o7PGB
[開箱]平靚正淘寶機箱簡易開箱兼DIY防塵(究極級防塵？)
https://goo.gl/NJu4pn
耐冇整電腦，見最近得閒又手痕，咁啱畀我知有朋友屋企部機壞咗幾年，曾拿出去整過但問題依舊，於是問佢拿咗嚟玩下。
一返到屋企馬上試機，結果發現開到喔！！唔通冇壞/只係小問題？
但一關機後又開唔返了，拆機發現係Socket 775嘅舊款電腦，主板ASUS G31晶片，e8400 CPU，2GB DDR2。
的確係幾舊了，朋友其實已換咗Laptop，已唔太急切去整，但e8400當年出嘅時候定位同宜家i5差唔多，用咗冇耐就壞咗，出去畀錢人換咗嘢都冇整好實在好可惜，刺激到我嘅挑戰心想救返佢。如果可以平平哋整返的話畀阿爸阿媽上下網或睇片都唔錯。
枱機其實幾易整，要換嘢比Notebook易配得多，只要兼容無須特定牌子都可轉換。
當將所有嘢拆曬，拿屋企啲已退役零件嚟試，發現除主板以外所有零件都正常；再拿其他RAM同display card去朋友嗰塊主板上試都開到風扇轉，但冇聲冇畫面，換RAM槽插同搵砂紙省過都係咁。CPU風扇風聲唔正常，轉速時快時慢，但火牛換咗都一樣。機箱除咗前面一把風扇入風外，背面同左面都有位但冇裝，問過朋友，佢部機放哩個位：
另外仲發現CPU風扇幾污糟，但火牛簡直新嘅一樣，如下圖：
陳豪聲：法官大人，由此我哋可以推斷死因：
-壞主板，而且好有可能係因過熱造成北橋之類芯片虛焊，所以隔一段時間又開得返，一熱咗變形虛焊，於是關機後又開唔返。
-其他風扇咁污糟但火牛咁新好明顯係之前拿出去整時被換咗火牛，結果返到屋企問題依舊。
感想：幾千蚊機賣嗰位冇幫User加風扇，整嗰位只換火牛都冇加上，幾十蚊嘢啫，就算唔肯包埋都應該建議User出錢加啦，好唔Pro囉。
就算當時冇死得咁嚴重，但只要花少少時間都能輕易發現係主板問題啦，哩部機預埋升級350W都畀多佢，用530W火牛只係想賺人多啲啫係唔係？都唔知之前整嗰位係技術唔够定黑心，但馬虎了事實有。嘢食煮得好睇個心，整電腦其實都一樣。
舊機最難其實係換主板，因為難買，難在花太貴去整唔值，海鮮坊仲有全新華擎G41板賣緊$520，但哩個價錢買到最新型號低端主板了，要買不如加多少少換埋RAM同CPU好過，所以唔考慮。淘寶CPU同RAM都還好，主板最麻煩，想要睇實圖好多賣家懶得睬你，但又好多維修品同瑕疪品，甚致水洗板，只勝在平同易搵。一開始淘寶算，型號都係華碩，但從G31升到G41，個款差唔多，賣家畀咗條試機片我先發貨，但結果到咗後用唔到一個鐘，關機時藍畫面，之後好難先開到，多試幾次後同舊嗰塊癥狀一樣風扇轉冇畫面，要安排退貨，香港退貨最麻煩，又要麻煩人幫我拿過去寄，已寄出但目前仲未退返錢畀我。
上面係原本塊板，下面係淘寶貨，個款差唔多，但比原本塊殘得多，鏽蹟又多，掃都掃咗好耐(結果白掃)：
畀淘寶塊板搞到心煩，想喺EPC交易區搵返塊二手，徵求下有師兄建議我去新高登睇下，於是當日就去咗睇，行咗幾間，有間G31要$160，G41要價$200，又係華碩而且塊板太闊，由於洗緊朋友錢買，加上想轉個牌子而再行多幾間格價，有間G31賣$130但係Magic Pro......最後行曬全場，去咗一間G31賣$120嘅睇下，結果拿出嚟時發現係G41嚟，有華碩同技嘉揀，老細話只需加$20。於是試下，並不厭其煩咁請老闆關機之後再開過然後先收貨，背板另外放，要自己記得提醒拿埋，主板盒喺要求下有，買完仲有7日保(後來收到EPC師兄PM報MSI板都開價$180，新高登買仲平)。
結論係：好過去淘寶，淘寶嗰塊100蚊人仔，冇得試唔知新舊程度(叫佢哋影相會叫你過主)，計返港幣同運費都分分鐘貴過香港買，最後退貨仲要自己承擔運費。
--------------------------------------------------------------------------
等板到前翻新同改造，翻新前：
RAM嘅金手指發現好多氧化，後來已省過：
跟主板加咗條2GB RAM，但都唔知轉過幾多手，啲易碎貼N層厚，試完後馬上酒精清走：
前面塊濾網要拆咁多位先拆到，個濾芯太可怕，加上唔方便拆洗，直接掉咗：
翻新後 ：
把風扇抺完塊濕紙巾已變成咁：
清塵同紮齊啲線：
生鏽螺絲都換曬(上舊下新)：
側板同後面加兩把9CM風扇：
加護線管改裝後：
PCI位加兩塊鐵片防塵，有一個位試display card時開嘅：
新版防塵罩，用軟磁鐵更方便拆洗，外加層膜固定同美觀(要加膠水先够穩)：
自己仲用緊口罩防塵，但幫人裝唔太敢，加上今次部機放喺死角位，所以轉用除塵紙，日本城1x蚊一大包。
懶，只整咗兩個，其他唔重要位貼口罩同透明膠紙封咗：
------------------------------------------------
新高登買嗰塊板好新淨，只需掃同抹下某些位就ok，不過個人有少少強迫症，連電容都用酒清抹埋先滿意 ：
Before：
After：
CPU風扇改造後：
但發現裝上後主板彎得好嚴重，芯片虛焊可能就係熱加變型長期夾擊導致，所以果斷換咗：
雖然原裝風扇喺技嘉嗰塊還好，但反正有多，而且775風扇已用唔著，所以直接送畀朋友算啦：
上機同走線：
測試期間耗電量未見上過80W，530W真係有必要？
我部二號機行緊兩粒Xeon CPU都係用緊520W牛：
IO防塵，只開咗必要嘅位，建議咗朋友淘隻Hubs駁上檯面用USB，另一個位留畀Printer：
注意：樓下有師兄提醒哩隻Hubs好易壞，原來金玉其外，唔建議購買
我啲嘢保養得好好，用咗差唔多兩年嘅繪圖卡賣畀人時冇拆洗過都仲好新淨，買家anon893師兄交收時都好滿意 ：
http://www.hkepc.com/forum/viewthread.php?tid=2427120
整完試咗成日先放心交貨
(啲白油冇天拿水抹，只好用萬潔靈抹完用黑色Marker補漆)
以前試過用皺紋膠紙貼住，但一耐咗啲膠蹟用WD40都好難清，於是改用透明膠紙算，而上面IO茶色膠紙不粘膠，平價得嚟效果好
最後，整咗幾錢：
--------------------------------------------------------------------------
題外話：退貨嗰時淘寶個老板要我包好啲畀佢，我話點樣嚟點樣返去，佢叫我搵個盒包多層。聽完真有少少火，佢送嚟時連盒都冇，只用個硬紙皮包住 ，裡面塞一兩層用過唔知幾多次嘅泡膠，摸上去成手都係塵，另加嗰條2GB RAM用紙巾包住送嚟。賣出去時覺得唔再係自己嘢就馬虎了事，當要收返時就叫人好好對待？退貨原因仲要我從「質量問題」改為「其他」，怕扣分。習慣留一線所以忍，但哩個交易實在令人失望透頂。
淘寶嘢因有問題退貨都唔係第一次，以內地黑心賣家咁多，一定唔會係最後一次，只能少淘同小心。
香港汰舊換新率好高，多支持下香港二手市場都唔錯，慳錢又環保。
汰舊換新率高，既係煲又係貶，煲在刺激經濟，貶在唔環保，錢用得唔理智，冇咁嘅需求冇必要洗咁嘅錢。 |
簡體版
訂閱頻道
訂閱電子報
發表於 2018-3-17 00:00
| 
：
：
