[開箱] SOUNDPEATS Air 3 半入耳式真無線耳機開箱評測

hk133

久違出開箱文，希望唔會寫錯嘢或者寫咗啲咩奇怪嘢⋯⋯

由於本人今年罹患極其嚴重嘅⋯⋯er⋯⋯拖延症，本來預定雙十一前出嘅 TrueAir 2+ 開箱評測，相就影好曬，草稿都寫好大半，但冇出⋯⋯

然後見到 Air 3 都出埋，買咗，所以就索性出 Air 3 開箱評測。
今次為免拖延症再度發作，就唔寫草稿啦，如果我寫到1999咁，請體諒。



（撳/click 一下圖片，就可以查看大圖）

以前我好多數都係出街先至用真無線耳機，貪方便，但喺屋企就都會用返有線耳機，始終音質好啲。不過依家少咗出街，成日用入耳式耳機，搞到耳仔會唔係咁舒服，於是我就開始買半入耳式嘅真無線耳機返嚟用。

一開始就係買 SOUNDPEATS TrueAir 2 以及 Haylou moripods，結果一比之下⋯⋯moripods 就俾我直接放棄咗。

不過 TrueAir 2 耳機外殼嘅防污塗層麻麻，用咗三個月左右，成副耳機充滿油光（耳油+面油），於是今年3月又買咗 TrueAir 2+，對比舊款多咗無線充電、支持 AAC 及 AptX Adaptive，仲有遊戲模式（不過到手之後發現呢個模式好多餘），最重要係，佢嘅防污塗層厚咗！用咗到依家都有接近八個月，暫時未淪陷，頂得住！

今次買 Air 3，就真係為買而買⋯⋯其實 TrueAir 2+ 都仲好地地，係咪真係有必要買 Air 3？呢度就賣個關子，一陣畀答案。



SOUNDPEATS好似本身係外貿品牌，所以包裝係全英文，另外黏貼咗一張簡體中文標籤喺包裝表面。今次呢張中文標籤嘅貼法，令我有啲懷疑職員係唔係同包裝上嘅女 model 有仇⋯⋯ 咁又係，連續三款耳機都係搵佢做 model，可能因為咁，搞到佢哋職員都睇到厭，要用標籤遮住佢？




拆咗塑封包裝，終於見到女 model 個樣～




包裝另一面就係展示耳機嘅外觀。

將上代 TrueAir 2 系列嘅包裝盒拍埋一齊，睇下有咩分別？
由左至右分別係 Air 3、TrueAir 2+、TrueAir 2。



TrueAir 2 系列就係用返同一張 model 相，咁又係，兩款外觀上基本係一樣，唔影新相都正常。
TrueAir 2+ 包裝盒左上角多咗一張 label 說明耳機支援無線充電。
至於新嘅 Air 3，就換咗新相，model 件衫變咗黑色，由張相都睇到 Air 3 嘅耳機柄比起上一代短啲，不過都要仔細觀察先會留意到。




呢度就費事講，各位可以撳一下圖片查看大圖。
TrueAir 2 當時係攞到日本VGP2021真無線耳機金獎，之後嘅 TrueAir 2+ 以及今次開箱嘅 Air 3 就都係用返相同嘅 QCC3040 方案以及 14.2mm 生物振膜動圈單元，TrueAir 2 系列調音就冇太大改變，Air 3 就要試過先至知～

睇完包裝外面就直接打開包裝盒啦，包裝係用彩色封套+黑色包裝盒嘅設計，但我今次冇影到個包裝盒⋯⋯所以就直接pass啦。



打開個盒就見到有張附加說明嘅紙，原來係說明書印錯嘢⋯⋯



攞走張紙都仲未見到個耳機⋯⋯有塊黑色海綿喺度擋住，攞走埋佢先。



終於見到耳機⋯⋯嘅充電盒，耳機出廠時已經預先放入充電盒。
充電盒上方嘅黑色細盒就放住充電線一條。



說明書就放喺最底。




非常普通嘅充電線，USB-A to USB-C。



充電盒係黑色磨砂外殼，冇咁易出現刮痕。



盒頂有 SOUNDPEATS 凸字。



USB-C充電接口喺充電盒底部。
Air 3 冇咗無線充電。




同 TrueAir 2+ 嘅充電盒對比，Air 3充電盒細個啲，同埋比較圓潤。




TrueAir 2+ 嘅指示燈喺裏面，係隱藏式設計。而 Air 3 就喺出面，可以望到指示燈位置有開孔。



兩者嘅打開方式亦都唔一樣，個人比較鍾意 TrueAir 2 系列嘅打開方式，取出耳機會比較方便。



Air 3 充電盒內有標註耳機左右。



今次 Air 3 耳機外殼嘅防污塗層感覺好似仲厚過 TrueAir 2+，應該唔使再擔心癡曬我啲面油耳油上去變到會反光。




將 TrueAir 2+（左）同 Air 3（右）拍埋一齊，見到 Air 3 嘅耳機柄係短啲嘅。




Air 3 嘅充電觸點位於耳機柄末端。




音質方面，同上一代嘅 TrueAir 2 系列一樣，即使佢係作為一款半入耳式嘅真無線耳機，佢係調音、分析力等方面對比同價位嘅有線耳機，其實唔係差好遠，甚至比起一啲傳統有線耳機廠商做嘅半入耳式耳機（當然係價位相近嗰啲）做得更好。

TrueAir 2 攞到日本 VGP 2021 真無線耳機金獎，我覺得係合理嘅，佢哋喺調音度真係有考慮到半入耳式耳機喺低頻方面嘅劣勢，所以有加返啲低頻，唔會為咗聲學曲線好睇，而夾硬將副耳機搞到冇咩低頻。Air 3 係唔需要用到耳棉都有幾好嘅低頻表現，而且佢嘅低頻質感都好好，鼓聲係有氣有力，唔會一pat嘢咁。人聲呢個價位嚟講都算係清晰嘅，同返價位相近、有線嘅半入耳式耳機對比都唔會輸。高頻表現都相當優秀，冇俾低頻影響到。

應該係 Air 3 本身用嘅動圈單元質素夠好，所以分析力都唔錯，同有線嘅半入耳式耳機擺埋一齊做對比都ok，本來半入耳式嘅結構都幾影響到佢哋發揮分析力，細節還原結構上已經比唔上入耳式，所以呢個價位做得好嘅真無線半入耳式耳機，分析力會好過有線嘅半入耳式耳機，我覺得都唔出奇，係估唔到我手上真係有好幾副有線嘅非入耳式耳機竟然喺分析力同人聲清晰度方面不如 Air 3 ⋯⋯聲場， Air 3 雖然係比較窄，不過都算係有嘅，至少喺呢個價位嚟講係滿意嘅，聽聲辨位都冇咩問題。

對比 TrueAir 2+，我就試唔出幾大分別，係相比之下 Air 3 人聲清晰少少，仲有低頻比較實咁，考慮到兩代耳機差價得幾十蚊，聲音方面冇明顯差距都係預料之內。

最後就等我開估，究竟 TrueAir 2+ 升級到 Air 3 值唔值得？我覺得就唔係咁值得，升級幅度唔大，體積細少少但用落真係冇咩分別。

不過如果你未買過 TrueAir 2 系列，我就建議直接買 Air 3，多幾十蚊，有入耳檢測真係幾好用，除低耳機識得自己停止播放音樂對我嚟講係幾方便，佢嘅識別都比較準確，算係實用功能。

而且防污塗層厚過上一代，冇咁易由磨砂用到識反光。



多謝各位CHing睇到最後，希望我冇打錯字啦⋯⋯

ronaldphl

Thanks for the review

Merra

正，我咁岩同你一樣都係有trueair2+同trueair3

開心使用中
我自己同意trueair3人聲同低音係好過2+
不過做gym因為人多，反而2+唔斷線，trueair3人多時候斷到爆，諗僅方法solve, 師兄有冇咩方法？

hk133

正，我咁岩同你一樣都係有trueair2+同trueair3

開心使用中
我自己同意trueair3人聲同低音係好過2+
不過做g ...
Merra 發表於 2021-12-24 09:02

    一般嚟講，有碌長柄嘅耳機，都會沿住碌柄放條天線。我估可能係 Air 3 碌柄短咗，條天線都跟住一齊整短咗，所以信號冇咁好、易啲受干擾？不過 SOUNDPEATS 佢哋冇公開天線設計係點，網上都唔見有人拆開嚟睇下，所以只可以估估下……