三次元實家探訪

stephenlau

話說同LL Sunshine大小姐真係有啲緣份，上次因為佢做電擊cover girl就以佢為重心巡咗一次，今次冇意中從網上睇到為大小姐配音嘅聲優鈴木愛奈做咗佢家鄉北海道千歲市嘅觀光大使，而從網絡得知佢實家係經營食肆，仲要風評唔錯，咁啱出遊有機會經過，就即管去佢實家睇吓。


店名：太陽之惠

呢度離新千歲機場唔遠但最方便都係揸車過嚟，門口有泊車位不過唔多，幸好到達嗰刻剛好有空位可以停泊，入去一眼見曬用餐地方大約七至八百平方尺可容納大約三十人，到達時間剛好平日午膳時段，見有着工作服嘅本地人用膳中，全場只有一位後生仔同一位中年女士負責落單送餐收銀清潔，餐牌價錢十分大衆化。



全部食品都附送咖啡一杯

柯打咗佢哋招牌嘅蛋包飯，但感覺廚房好似得一個人一腳踢，那位女士都經常入去幫手，等候時間頗耐，只聽到從廚房傳來發蛋嘅聲音，期間細心觀察四周環境，牆上掛滿鈴木愛奈同佢有份聲配嘅作品簽名相片/畫，仲有未出道之前攞嘅獎狀。





顧及其他在場食客私隱未能拍攝全景

用咗接近半個鐘終於等到份餐上枱，分量頗充足，嗰日天寒地凍都食得飽，味道未至於絕頂但性價比冇得輸，由於要趕行程關係食飽便盡快結帳，臨離開嗰陣嗰位中年女士突然間用日文問我係咪為咗鈴木愛奈而嚟，我回以一個點頭後佢即時給我送上一枝波板糖（好人卡？）為呢個午餐完美作結。


個汁整得幾好味

hk133

感謝分享！有時間去日本嘅話我都想去一趟