[開箱] $99 V-MODA Hexamove Lite 開箱評測

hk133

（本文內所有圖片，點擊圖片即可查看大圖）
（另外希望各位 CHing 講返自己係睇到正常中等 size 圖片抑或只係得縮圖，
都想瞭解下依家呢個圖床係咪真係咁廢。我就長期都係只見到縮圖。）



又係上次賣 Grell 真無線耳機嗰間網店。不過要注意即使係有註冊帳戶嘅會員，購物未滿 $100 都會另外收 $30 送貨費。
仲有 V-MODA 象徵配色 黑+紅，已衝等收貨。
年輕人的第一副 V-MODA 耳機？

update：V-MODA 自己都劈咗價，$14.99 USD 就買到。
俾多啲，$29.99 USD 可以買 hexamove pro 添。

——————

尋日上午落單，今日收到。
為咗免運費而買兩個，加埋都係 $198，比上次隻 grell 平 $1，
不過今次冇送埋貼紙俾我，冇得玩貼紙。

睇下個包裝，黑色盒 + 白色封套，
再睇下包裝底部參數， Assembled in Thailand，泰國組裝，
$99 嚟講冇投訴。今晚有時間再寫開箱文。
（點擊圖片查看大圖）




12/22 update：
由於處理緊魅族 PRO 5 變磚，開箱文暫延發佈直至另行通知。
23:55 update：
部機有排整，放埋一邊寫咗開箱先。稍後發佈。

———————
仔細搵返呢間網店嘅背景，似乎係 e 字頭代理自己開嘅？
地址都幾乎一樣，同一層、不過 e 字頭代理係寫 1-9 室，呢間網店就係 2-3 室。
收據都見到 e 字頭代理個 logo。

今次冇送一大疊貼紙，估計係因為用咗紙皮盒包裝？
之前冇用紙皮盒包裝，所以放一大疊貼紙做當做緩衝？



包裝盒靚過之前 grell 個「環保」紙皮盒，彩色印刷嘅白底卡紙作為封套，
裡面係黑色內盒，紙盒紙質唔錯，以原價 $980 嚟講交足功課。





包裝側面係 V-MODA logo，
背面印有產品特色介紹，包括 AptX Adaptive，6小時播放時間⋯⋯
不過「便攜盒可提供 XX 小時的使用時間」係乜料？
真係就咁印 XX 落去，唔使 check 下？笑咗。
其他語言都有寫到 XX = 18，如果唔係就變成猜謎遊戲。




底部就有產品序號貼紙，商品 barcode 以及版權資訊。
仲寫住 Assembled in Thailand，以及顏色 RED。

不得不提，要無損拆白色封套係有相當大嘅難度，
難怪包裝表面一條封條或者塑封膜都冇。
但係有難度唔等於做唔到，雖然相中呢盒拆爛咗，
不過另一盒我慢慢拆係可以做到近乎無損拆開，
至少外觀上睇唔出係拆過。所以封條貼紙或者塑封膜始終有佢嘅存在價值。




拎開白色底嘅封套，裡面係黑色包裝盒。
包裝盒正面有大大個 V-MODA logo，應該係紙盒表面印一層透明膠膜製成。




打開個盒，首先係見到 Hexamove Lite 嘅充電倉，
充電倉好大個，因為裡面有暗格。




充電倉下面係配件。
不過要拎起充電倉下面墊住嘅海綿係有少少難度，因為塊海綿比較緊貼個盒。




配件全家福。配件包括一大疊說明文件、充電線以及替換耳塞。







但係幾份說明文件裡面，冇一份係有介紹 hexamove lite 機身嘅功能，以及觸控操作、充電指示燈定義等詳細資料，
想知道呢啲嘢，係要根據黑色嘅入門指南裡面提供嘅網址，到 V-MODA 官網查閱電子版說明書。
而摺到幾乎係正方形嗰份嘢，竟然係單面印刷，要環保就麻煩做齊全套 ok？





講返個充電倉，其實佢表面係有保護膠膜，不過保護得一半，
主要應該係怕放入盒嗰下會刮花？不過保護得一半都幾奇怪下。
充電盒背面有充電指示燈、USB-C 充電接口以及一個按鈕。
按鈕除咗可用於日常確認電量，亦可以用於重設耳機設定。
依家天氣凍，個盒摸落有啲涼浸浸，有啲似係金屬表面？
不過搵唔到網上有寫充電盒材質，唔敢肯定。




充電盒底部就貼有產品參數貼紙，
不過呢度就見到個充電倉係 Made in China，
咁究竟包裝上嘅「Assembled in Thailand」，係有邊啲部份喺泰國組裝？
咁大個充電倉都係得 500mAh 電池，就算扣除暗格佔用嘅空間，都係屬於偏細。




打開充電盒就見到耳機放喺入面。



充電倉暗格就係喺上蓋部份裡面，
掀開擋板就見到裡面有一個頗大嘅空間，足夠擺放替換耳塞以及充電線。
擋板同上蓋係以磁力吸附，應該不用擔心頻繁開合會損壞，
但用於吸附嘅磁石直接外露，看似係以膠水黏合於上蓋及擋板，
處理得比較粗疏，雖然應該唔會對使用壽命有影響，但觀感上都係扣分。




充電倉內耳機充電觸點有鍍金。




全新狀態下，耳機嘅充電觸點貼有絕緣貼紙。





耳機黑色觸控部份係光面，而紅色部份就係磨砂面。
但紅色部份似乎冇經過特別處理，
加上塑膠接合位都有較大縫隙，觀感上略顯廉價。
Lite 似乎係喺戴喺耳仔睇唔到嘅部份度著手節省成本？
至於耳機導管濾網係黑色紗網。

首先係連接部份，講到藍牙 5.0 + AptX Adaptive，
就基本上可以肯定係 QCC512x 系列藍牙芯片。
QCC512x 作為 Qualcomm 旗艦系列嘅藍牙芯片，
連接穩定性、效能等都比同代入門級嘅 QCC302x 好唔少，
而支援 AptX Adaptive 呢點更加係比入門級後繼嘅 QCC3040、3046 優勝，
Qualcomm 入門級真無線耳機藍牙芯片，要到再之後嘅 QCC305x 系列先開始支援 AptX Adaptive，
而 QCC304x & 305x 系列係藍牙 5.2。
可以話 Qualcomm 唧咗兩代牙膏，先唧到 AptX Adaptive 出嚟俾入門級真無線耳機藍牙芯片使用。
咁睇落雖然 QCC512x 系列用緊藍牙 5.0，但技術上都唔算舊。
連接穩定性同音頻處理效能理論上相對入門級嘅 QCC302x 甚至 304x 好一截。

至於操作方面，hexamove lite 嘅觸控操作，其實有啲奇怪，
準確嚟講，佢嘅操作方式唔係「觸控」，係「觸碰」，
手指輕輕掂落去係冇反應，但手指以及任何手指以外嘅物品，
以一定力度碰撞到耳機黑色部份，佢就會有反應。
結果就係有時除低耳機放喺枱面，都有機會觸發到佢嘅反應。
睇返說明書介紹，佢嘅「觸控板」位置係放置咗「觸摸陀螺儀感測器」，
即係應該係測量耳機移動而判斷係咪有觸碰操作？陀螺儀呢個用法都幾新奇下。

至於音質，雖然 hexamove lite 低頻對比一般監聽耳機比較多而且偏厚，
但其實以真無線耳機，尤其係對比運動耳機品牌嚟講，呢個份量唔算多，
而且都有注重低頻嘅質感，又兼顧到中、高頻嘅質素。
紮實、反應迅速嘅低頻搭配清晰嘅中頻、清脆嘅高頻，
加上耳機採用嘅動圈單元質素本身都唔錯，即使調音上有廠商嘅偏好，但基本盤都係做得稱職，
係一副音質討喜而又功夫到家嘅真無線耳機。
當然，如果係著重準確還原多於著重聽感，或者唔鍾意低頻較多，hexamove lite 就唔太合適。
最可惜係 hexamove lite 不具備 pro 嘅自訂調音功能，如果唔係就有更多玩法。

以上嘅評價以原價作標準。
依家清貨價 $99 平賣，可以話係送禮自用兩相宜，大大個 V-MODA 牌子都叫見得下人，
包裝靚，藍牙連線穩定，加埋幾好嘅音質、討喜嘅流行調音，係得觸碰操作有啲特別，不過呢個價錢冇投訴。
如果有埋 ANC 就真係通勤必備良品，可惜冇。

lyjhf2006

980 打到骨折？呢個肯定便野冇好野

hk133

980 打到骨折？呢個肯定便野冇好野
lyjhf2006 發表於 2023-12-20 01:16

    好似話係低音好勁⋯⋯
    不過 $99 買到隻 V-MODA 耳機，識響我覺得已經贏咗一半，
    如果連接手機夠穩定、聲底又唔差嘅話就賺咗。

a9668823

（本文內所有圖片，點擊圖片即可查看大圖）
（另外希望各位 CHing 講返自己係睇到正常中等 size 圖片抑或只 ...
hk133 發表於 2023-12-19 23:34

同 Grell 比,
D聲點?

hk133

同 Grell 比,
D聲點?
a9668823 發表於 2023-12-24 14:20

    hexamove lite 嘅音量下限比 grell tws1x 低，要將兩個較啱音量對比都要啲時間。
    我習慣耳機音量偏低，剛好聽得清細節就夠。

    單論聲音質素，兩者之間我覺得差距唔大，但動圈單元直徑 hexamove lite 比較細就註定輸蝕，
    grell 嘅聲場比較闊同有開揚感，hexamove lite 就較窄，
    加上低頻量相比下明顯較少，使得 grell 喺細節還原方面係略為優勝。
    兩者比較之下，hexamove lite 喺聽流行曲嘅時候就顯得 bass、鼓嘅低頻較為厚重。
    但調音取向呢回事，只要唔係太過火，其實無分好壞，只有喜惡。hexamove lite 低頻量雖然相對較多，但又未至於令我反感。

    grell 仲可以用 soundID 調整音色，不過個人覺得 soundID 入面嘅 「studio reference」模式仲衰過 disable SoundID，因為人聲會變得冇咁清晰，高頻部份都有些許削弱。「Community favorite」低頻有加強，不過量感同質感都係不及 hexamove lite。

    連接穩定性方面，喺我使用期間兩者無明顯嘅差距，
    但 Grell 想要連接穩定，就要謹記先拎放喺充電盒右手邊嘅「左耳」出嚟，然後先再拎放喺充電盒左手邊嘅「右耳」出嚟，掉轉次序拎就會好易受干擾。
    而 hexamove lite 就唔知有冇呢個問題，呢幾日出街都醒唔起要試試掉轉次序拎耳機，睇下有冇相同嘅 bug。而我平時又習慣拎充電盒左手邊嘅耳機出嚟先，要特登掉轉次序真係好考記性⋯⋯

    使用體驗方面，如果係指觸控/觸碰操作，兩者真係半斤八兩咁難用，grell 就靈敏度奇怪，hexamove lite 就用陀螺儀，各有各難受。
    配戴就係 hexamove lite 較舒適，體積較細重量又較輕（10g vs 14g），
    就算 hexamove lite 充電盒咁大件都係輕過 grell（52g vs 60g），
    不過 grell 有 ANC 呢點就贏咗一大截。
    另外 hexamove lite 冇播放聲音超過 5 分鐘係會自動關機，關機時嘅提示聲都唔細聲，唔適合做睡眠耳塞。

a9668823

hexamove lite 嘅音量下限比 grell tws1x 低，要將兩個較啱音量對比都要啲時間。
    我習慣耳機音 ...
hk133 發表於 2023-12-26 02:15

thx
另外可唔可以同時連2部電話？

via HKEPC IR 5.1.13 - Android(5.1.2F)

hk133

thx  
另外可唔可以同時連2部電話？

via HKEPC IR 5.1.13 - Android(5.1.2F)
a9668823 發表於 2023-12-26 07:36

    講起就神奇，hexamove lite 竟然可以同時連兩部手機，切換已連接嘅手機仲唔使入設定，保持連接狀態下直接播嘢就得。
    喺 A 手機播放音樂，跟住喺 B 手機又播放音樂，佢會繼續播 A 手機嘅音樂。但當 A 手機暫停播放，佢就識得自動切換，播放 B 手機嘅音樂。

    反而硬件比較新嘅 grell 唔得，一次只可以連一部手機。

a9668823

講起就神奇，hexamove lite 竟然可以同時連兩部手機，切換已連接嘅手機仲唔使入設定，保持連接狀態 ...
hk133 發表於 2023-12-27 05:47

加左價$199

hk133

加左價$199
a9668823 發表於 2023-12-27 03:53

    價錢.com 仲有其他舖頭賣緊 $99。

摩囉星

趕上了$99的尾班車

下載 (59.54 KB)

2023-12-29 11:48